Principio e Fin de todo

Que difícil é atopar información sobre o libro Cero de Oriana Méndez na rede, hai moitas outras persoas que se chaman igual ca ela, e sobre os resultados de cero, imaxinade o número de referencias que saen ó pulsar o click!

Pero tiven sorte e o Diario Cultural da Radio Galega tivo a ben levala ó programa ou contactar con ela por teléfono e así puiden oir a voz desta escritora que me ten fascinada... e saber máis deste estraño e poderoso libro.

Aquí vos deixo o enlace, espero que non sexa efímero, pois non vexo claro que pervivan todos os programas tal e como sae a gaioliña. Se o queredes escoitar estes días, está no programa do venres (no minuto 47, aínda que todo o programa é interesante!)

Hoxe si imos ver CISNE NEGRO e celébroo con este poema, que non vai do mesmo, pero me gusta achegar imaxinarios cando a palabra, a forma coincide... como combinar cores, ou elexir sabores.

ASÍ, desta maneira que vedes

espidos coma os dedos máis espidos

dos arrabaldes desta cidade

decidimos arder todos os documentos que nos

       relacionaban

cos cisnes de colo negro

Coñecemos ben esa clase de cisnes

habitan as augas do sur

e neste continente son os únicos representantes

dos cygnus lunares

Entón as galaxias, invertebradas

Os planetas coma a lava

A linguaxe as propias conexións neuronais

a capacidade de manifestarse

arrasar

Nós non elevamos as nosas extremidades

ata o confín destas augas

aquí fermentan os ollos o sal nos ollos a pel a lepra

Os planetas coma a lava A pel A lepra

Coñecemos ben esa clase de cisnes

os únicos representantes dos cygnus lunares

E nós a lepra

nós a ponte que é a disección dun albatros:

expandido e infinito

partindo o mundo entre este escuro  o horizonte

revolvéndose coas illas

Entón as galaxias, invertebradas

No ventre da ría dos rostros un sepulcro

contra outro sepulcro

e todos respirando sobre as ondas

A dor así, desta maneira que vedes

espida coma os dedos máis espidos

dos arrabaldes desta cidade

decidiu arder todos os documentos que a

      relacionaban

cos cisnes de colo negro

A dor axexa a illa

Son os ollos mouros dos torturados

que se baten contra ela

o bafo amarelo dos torturados

o cerebro

as moscas

San Simón

a febre

ORIANA MÉNDEZ, Cero, Galaxia, 2011